Jeddah talks Help?
ظاهرة غريبة انتشرت بين شباب جدة!!
السلام عليكم ورحمة الله وبركاته
من حيرتي واندهاشي حبيت اطرح هذا الحوار عليكم يا جيراني
اليوم كان عندي مشوار على الاندلس مول وشفت هـ الشوفة اللي ادهشتني او استفزتني
مجموعة شباب يمكن كان عددهم 5 او 6 من عمر 17سنة ومافوق لابسين كاجول تيشرت على برمودا وكلم نفس الشي مع اختلاف بسيط في الاوان
الشي اللي استغربته ان المجموعة كلها شايلين شنط من اللي تنحط على الظهر وحجم الشنطة كبير ومبين انها مليانة
السؤال اللي جا في بالي هم ايش حاطين فيها؟ لان هم بالمول للترفيه وماهم اطفال صغار اقول امهاتهم حاطين فيها غيرات واشياء تانية
والغريبة انهم حاطين سماعات كبيرة مطقمينها مع التيشرت والجزمة "اكرمكم الله"
في البداية قلت بس هذول يعني مجموعة وحدة مو مشكلة الا وشوي مجموعة تانية وثالثة بنفس المنظر ساعتها اتأكدت انها موضة جديدة بين الشباب
لكن يضل السؤال محيرني ياترى وش حاطين في الشنطة؟
وهل هذا تقليد للغرب؟ لاني بشوف في الافلام الاجنبية هـ المنظر بس مو مجموعات مثل عندنا
شاركوني رايكم بالموضوع.
دول تلاقيهم اللي يلعبو اسكيت
دي الشنط فيها الاسكت حقهم
بس بجد انتشرو مرا كتيييير
اهلا رائد
شكرا لك للتوضيح لكن انا برضو مستغربة ليه لازم يكونو مطقمين زي بعض في الملابس والشنط ؟
وبعدين يشيلو شنط الاسكت بمول كلو عوائل!! لو مكان مناسب لممارسة هذي الهواية ممكن
ولا ايه رايك؟
السلام عليكم ارجوكم لا تعطو لهولاء اهمية وابحثو عن الشباب الجيد المحترم وتحدثو عنهم لماذا ؟ان اذا انتشرت فكرة في مجتمع ما وتحدث عنها الجميع سارت ظاهرة قد تكون سيئة اوقد تكون العكس ولكن تحدثو ا غن مدينتنا الحبيبة وكيف صار وضعها وهل انتم سعداء بما فيها من فوضى جدة الان كالبيت الذي يسكنه سكان حهلة من القذارة وعدم النظام وعدم الشعور بالمدنية فيها والله سافرت لمدة اسبوع الى الدمام لم ارى قذورات مجمعة ولا شوارع مكسرة والناس يتعاملون بكل هدوء لعدم وجود الزحام في الشوارع وعدنا الى جدة ومن اول طريق المدينة بدا الزحام وكل ما عبرنا شارع نرى كمية القاذورات المجمعة وعدد الحجات امام حاويات النفايات. هذا ما يجب ان نزيله ونساهم في حله
اهلين صفية
مسالة جدة والعشوائيات اللي فيها ةحاويات الزبالة والحجات اللي قلتي عليهم سبق وطرحنا حوارات كثيرة تناقش هذي المشكلة لكن الحين في شي غريب قاعد ينتشر بين الشباب ولازم نعرف كيف نتصرف معه لان اللي شفته امس استهتار واضح من الشباب بممارسة هواي السكيت بين العوائل داخل المول مما يعرض الاطفال الصغار للخطر.
لا مو هرجة انو المول مكان موناسب لدي الهوايه
بس انو تلاقيهم كانو يلعبو في مكان زي الممشى اللي قودام المول بعدين جايين يعملو شوبنق
بس انا اشوف عادي يعني في حركات تانيه عند الشباب بجد تنرفز
زي دحين اللي يروح عند حجه عشان تضفر لو شعرو بـ 50 ريال عشان يصير زي الامريكان دول
وربي عليهم اشكال تجيب الهم
طيب اش رايك انهم كانو يمارسون هوايتهم داخل المول وحتى بمطقة المطاعم طفلة صغيرة كانت حتروح فيها لو امها ماسحبتها بسرعة من قدام الشباب الرايحين وجايين بالاسكيتات
وبالنسبة لمسالة الشعر هو الخسران فلوس وصداع لان هذي الظفاير تسبب الصداع الشديد لكن مسالة السكيت هي اللي فيها خطورة ولازمها حل جذري .
السلام عليكم
والله يا اخت ماجده اغلب شركات الدعاية والإعلان في هذا الوقت توظف الشباب الصغير لتوزيع منتجات في اغلب مولات جده لانه سبق وشفت زي كده كثير .. فهذه الشنط الكبيره احتمال تكون بداخلها منتجات يقوموا بتوزيعها على الناس او كما ذكر الاخ رائد .. بالنسبه لموضوع اللبس فهذا للاسف شيء دخيل على مجتمعنا العربي الإسلامي .. في الاخير الرك على الاهل وطريقة تربيتهم لأولادهم . الواحد صار يشوف عجب العجاب في المولات ويقول الله يستر من الي جاي .
مع التحية
انا معك وهذول يكونون معروفين ويتعاملون مع المتسوقين بكل احترام لكن الشباب اللي بتكلم عليهم شي مختلف تماما للاسف طلع انهم بيعملو حركة يبينو انهم اصدقاء ومسوين حركة والشنط بيحطو فيها الاسكيت اللي بيفضلو يلفو المول كلو وهم يمارسو هواية مو في مكانها ابدآ لانهم يسببو ازعاج كبير للناس ويعرضو الاطفال الصغار للخطر
ومثل ماقلت الرك على توجيه الاهل وطريقة تربيتهم .
ياأخت ماجدة لابد من الإهتمام بهؤلاء الشباب بدلا من مطاردتهم وذلك بشغل أوقات فراغهم بمايفيدهم وذلك بتوفير أعمال موسمية مثلا أوملاعب ومسارح وسينما وحلبات سباق منظمة ومكتبات عامة وحدائق عامة وكما هو حاصل في البلدان المتقدمة ، لأن هذه الطاقات إذا لم يتم إستغلالها في المجالات المفيدة فد تتحول إلى أعمال تخريبية ومضرة بأمن المجتمع ، إنهم بحاجة إلى من يهتم بهم وبحاجاتهم الروحية والجسدية حيث أن معظم الأمهات في مجتمعنا مشغولات بالتسوق أو العمل أو الإهتمام بآخر صيحات الموضة والأب مشغول في عمله أو في الإلتقاء بشلته والأبناء ضائعون في الشوارع والأسواق
عيدروس الله يسعد صباحك او مسائك
والله تحسسني انك طالب مثابر ياعزيزي وانت في صغرك ماذا كنت تعمل بصراحة !!!!!!
الشباب لديهم طاقات ولابد من تفريغها تفريغ إجابي فلا تدقق عليك بتوجيه فقط ( لأن القربة مخرومه )
اهلا عيدروس
ياريت يتم الاهتمام فيهم وعمل اماكن خاصة لممارسة هواياتهم وتكون داخل المولات لان اغلبهم يكونو طالعين مع اهاليهم ومضطرين يكونو موجودين في المول معاهم .
أخي نايف أسعدالله مساك فعلا كنت ومازلت طالب مثابر ومجتهد بل طويلب علم دنيا وآخرة وكنت أحصل دوما على المرتبة الأولى على فصلي أو على مدرستي ، والمرء كما تعلم لايولد عالم وليس أخو علم كمن هو جاهل أما القربة المخرومة كماذكرت فقد كثر الخرق على الراقع وأتمنى أن تتحول مدينة جدة إلى حاضرة بمعنى الكلملة أي أن تحتوي على مكتبات عامة ومسارح وسينما وحلبات سباق وحدائق عامة وملاعب رياضية وحمامات سباحة حيث أن لدينا إمكانيات مادية ضخمة جدا ولا ينقصنا سوى إستغلالها على أحسن وجه وعلى سواعد شبابنا وشاباتنا ولابأس من الإستفادة من إمكانيات العلماء والخبراء من الشرق والغرب لتوجيه هذه الطاقات الشبابية لوجهتها الصحيحة قبل أن تتحول إلى طاقات مدمرة إن مدينة جدة وبكل أسف تحولت إلى مجموعة فارغة(مجموعة فاي بلغة الرياضيات) حيث عناصرها أسواق فقط تشبع البطون دون العقول أي أن عقول الشباب فارغة بينما البطون ممتلئة إلى حد التخمة ، حيث ترى ظاهرة السمنة ومايتبعها من الخمول والكسل والنوم نهارا والسهر ليلا منتشرة بين شبابنا وشابتنا فكيف يكون مستقبل البلد ؟!! الله يستر بس
انا عندي قناعه انو مهما عملت لايمكن تغير انت كل الناس دي كلها
صح انو لازم توعي الشباب وتفتح لهم مجال بس بعد ايييه؟!
خلاص زي ما يقولو بعد ما وقع الفاس في الراس
انا اقول لو انو دحين تتوجه الطاقات لتوعية الجيل الجديد يعني من سن 5 سنوات الى 15
دول هما الجيل اللي راح يجي واللي لازم يكون اوعى من الجيل اللي قبلو
خلاص احنا راحت علينا والله لو يوعونا من هنا لمن بكرا خلاص صارت الشغله قناعات مستحيل الشاب يتخلى عن قناعاتو
صح انو فيه شباب واعي وشباب لو وعيتو راح يتوعى بس انا اقول لو يركزو على فئة الصغار بعد 10 سنين راح يكون عندنا جيل زي الاوربيين منظم ومحترم (معليش على كلمة اروبيين لاني اشوف فيهم تعاليم الاسلام اكتر منا احنا المسلمين )
معك حق رائد
المفروض نركز اهتمامنا على الاطفال الصغار بالتوجيه السليم وليس بألاوامر لان الطفل بطبعو يحب العناد .
غني ياليييييييييل ما أطولك
يعني حتى لو حاولنا نوقف هذا الشي يالي بيصير الان
بعد فترة حتلاقي شي جديد
المشكلة أنو مافي تحمل أو شعور بالمسؤولية
فكل واحد بيسوي يالي يعجبه بغض النظر عن الناس يالي حوله
الله يستر علينا بس
اهلا حسن
معك حق كل فترة بيطلعولنا بشي جديد لكن لو احنا اتبعنا معاهم اسلوب التوجيه بالاقناع وليس الامر الا ما يجيب نتيجة لان المنع بسلطة الاب والام يجيب نتيجة عكسية دائما
لازم نخاطب فكرهم مثل اي شخص بالغ بكذا نوصل ولو اخد مننا الموضوع محاولات كثيرة.
السلام عليكم ورحمة الله وبركاته جميعا
صحيح أن الظواهر الغربية ظهرت في مجتمعانا وصحيح أن الشوارع أمتلأت بالنفايات وعلى قولكم ( الحجات ) عند الحاويات والحفر و مستنقعات الأبيار وقلة أماكن الترفيه والترتيب العشوائي و الإزدحام و الأسعار الباهظة و.....و.....إلى مالا نهاية شعر راسك يطيح وانت باقي ماخلصت.
قال الله تعالى في كتابه الكريم: ( إِنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنْفُسِهِمْ )
لماذا لا نبدأ أولا بأنفسنا ونترك الإنتقادات والسلبيات ونبحث عن الإجابيات والحلول
أذكر لكم موقف بصراحة جدا عجبني
في السنة التي قبل الماضية كنت بمدينة جاكرتا بأندونيسا والمدينة هذه مشهورة بإزدحامها وكثرة عدد سكانها ولكن ماذا يفعل الشعب لحل هذه المشكلة اصبح هناك مجموعة الشبان هم بنفسهم يقومون بتنظيم السير بصراحة موقف رجولي رائع ينم عن ثقافة البلد وشعبها وهم لو انتظروا الحل أو انتظروا من يحلوها لهم (ردد ياليل ما أطولك) .
بصراحة ودي أهل جدة يكونو يد وحدة يخافو على مصالحها طفل شاب وشابة رجالا ونساء وأن نبادر ولا ننتظر لا أن نرى شيئا لا يعجبنا وننتظر من لا يهتم.
اهلا محمد
وعليكم السلام ورحمة الله وبركاته
معك حق لازم دائمآ نبدأ بانفسنا وماانكر انا مرة شفت موقف في احد شوارع جدة شباب كانو واقفين يوجهو حركة المرور في الشارع لين وصلت سيارات المرور وحلت المشكلة لان كان في حادث سبب زحام كبير وهذا دليل انو في عندنا شباب واعي لكن للاسف قلة وياريت هذا يعم على كل اهالي جدة .
هذا اخر الزمان اخت ماجده يمكن مخنثين ناس ماهي لقيه تأكل وناس من الفراغ مسخنثه الحمد لله الذي عافنا مما ابتلهم فيه وفضلنا على كثير من خلقه 00
اهلا فايز
للاسف انو مو هذا موضعنا احنا هنا نتكلم عن عن ظاهرة ان الاصدقاء يلبسو زي بعض وكانها حركة تدل على صداقتهم لدرجة انهم يمارسون هواية الاسكيت مع بعض في غير مكانها لان المول مكان غير مناسب لهذي الهواية
وانا طرحت الحوار عشان نلاقي طريقة سليمة لتوجيه هذول الشباب .
اهلا اخت ماجده اولا اسمي مهند ثانيا صحيح ان شبابنا فيهم الخير والبركة لكن يحتاجون إلى من يدلهم إلى الطريق الصحيح و أنا متيقن انه سيأتي يوم نكون فيه قدوة للمجتماعات الأخرى بإذن الله تعالى إذا وضعنا ايدينا بأيدي بعض.
اخوي فايز الفايز صبحك الله بالخير لي تعليق بسيط على كلامك معليش يا أخي ما يجوز ان نطلق على أخواننا الصغار هذا الوصف لا تدري هؤلاء اليوم طائشين وغدا يافعين مفيدين أدعو لهم بالهداية خير من وصفهم بصفات غير لائقة .
أخيرا كل بني آدم خطائ جميعنا أخطئنا ولا يوجد من لا يخطئ .
اللهم أهدي شباب وشابات المسلمين وأصلح أمورهم اللهم آمين.
العفو منك مهند على الخطاء باسمك وانا معك انو شبابنا ينقصهم التوجيه السليم وهذا الهدف من طرح الحوار
واتفق معك في مسالة وصف الشباب بصفات غير لائقة لان هذا مايعالج المشكلة بالعكس ممكن يخليهم يعاندو اكثر ويتمسكون بهذي الظواهر .
شكرا لكم اخواني معلش يمكن خاني التعبير وشكرا للانتقاد لااسلوبي اعتذر مرة اخري والله يهدي الجميع الى مايرضى 0
مجموعة مراهقين بعيدين كل البعد عن عيون أسرهم وتوجيهاتهم مذا ترجين منهم ؟ هل نلومهم ؟ نعم عليهم جزء من اللوم ولكن الجزء الأكبر على الأسرة والمجتمع ، لو كان المجتمع يزدرء هذه التصرفات وأنكرها لكان لبعض هذه التصرفات التي لا نرغبها أصبحت من الماضي ، لكن يجدون التشجيع وابتسامة الرضا من الكثر مما يزيدهم غوغائية تجعلهم ينظرون بأن مايقومون به صحيح ويدخلون عقول مجتمعهم بأنها حرية شخصية ( أنا اتفق أنها حرية شخصية لكن بحدود ) .
صدقوني لا أحكم على الناس من لباسهم إن كان بحدود المعقول ولكن أحكم عليهم من أفعالهم وهذا لا يعني بأن اللبس لا يعبر عن شخصية الإنسان بل يلعب دور كبير حتى في تكوين شخصيته وهذ حاصل عند البعض للأسف .
للاسف ان المراهقين الحين مافي اي رقابة عليهم من ذويهم وانا اتفق معك لو كان في توجيه ملائم من الاهل كان ماشفنا هذي المظاهر
لكن سبب طرحي للحوار هو كيف نوجه هذول الشباب او المراهقين بدون مانخليهم يعاندون اكثر ؟
رغم أني ضد التقليد الاعمى والامعية اللي في مراهقينا عموما شبابا وبنات ... لكن بيني وبينك .. لازم نراعيهم ونفهمهم كمراهقين !! فمن خصائص نموهم الولاء للجماعة وهذا يجسده التطقيم بالملابس وخاصة الشباب عندهم روح التنافس والفرق عالية ..ومن خصائص نموهم اثبات الذات حتى لو بالاختلاف وحب لفت الانتباه اليهم .. ولو طلع انهم شايلين اسكيت ومنشورات زي ما دائما اشوف او حتى اللابتوب حقهم .. اقول >>> اش فيها .. ؟!!! خليهم على قدر سنهم .. ! يعني ما سووا شي حرام حتى نهب فيهم ..الأصل في الاشياء الاباحة ... وانا والله لو يصح لي في هذه المولات الهمّ من كبرها لاتجولت فيها بإسكيت ! اي نعم شي غريب ما اتعودنا عليه ما اختلفنا .. هنا.. ممكن نوجهم ...مافيها شي تتطقموا مع بعض لو كنتوا فريق مثلا لكن بضوابط يعني مثلا تكون خيراتكم اكثر احترافية ورجولية .. نوجههم لاهداف عالية باسكيتاتهم دي زي ما يوزعوا منشورات اعلانية ممكن كمان منشورات تثقيفية لخدمة المدينة وزيادة الوعي او اي شي راقي .. وكدا وظفنا طاقاتهم بالطريقة اللي يحبوها مع توجيه بسيط اللي احنا نبغاه منهم وكمان ساهمنا في تفعيل دورهم في المجتمع ويستفيد المجتمع ..
معك حق وهذا اللي مفروض يصير من الاهل والمجتمع هو توجيههم لكن انا اللي شفته انهم يستخدمون الاسكيتات بطريقة مخيفة وتعرض الاطفال الصغار للخطر وهذا اللي ماحبيته وشفته خطاء كبير .
ي إخوان والله شبابنا فيهم خير بس التوجيه و الاهتمام و التوعيه المستمرة معدومه عندنا
فعلاً امسك بيدك واقول التوجيه ثم التوجيه مع الحوار هو اهم وسيله للنمو